Бизнисменот, Трифун Костовски кој беше и мнозинскиот акционер во „Еуростандард банка“ на којашто пред неколку месеци и беше одземена дозволата за работа во изјава за „Фокус“ вели дека денеска слушнал за кривичната пријава што ја поднесе Народна банка, иако ниту тој нема информација против кого точно е поднесена. Сепак, вели дека очекувал да биде поднесена бидејќи премиерот Зоран Заев сам најавил кривични пријави на средбата со оштететените доверители.

-И јас денеска дознав за предложените кривични пријави од Народната банка. Јас ги очекував и навистина ми е мило што сета оваа голгота ќе добие каков – таков епилог. Значи, човекот со чисти раце инсистираше на кривични, премиерот како портпарол ги најави на средбата со оштетените од стечајот на Еуростандард банка, одржан пред два дена и секако дал налог да се објават во јавноста! Убеден сум дека мојата колумна од пред два дена длабоко ги вонемири. Откриени се црните намери! Вистината за стечајот е само една! Политичко бизнис криминал!, вели Костовски во изјава за „Фокус“.

Ниту од Народната банка, ниту од Јавното обвинителство нема информации против кои и колку поранешни одговорни лица од Еуростандард банка е поднесена кривичната пријава за предизвикување стечај.

Народната банка образложува дека заради карактерот на постапката и почитувајќи ги надлежностите на Јавното обвинителство и правото на пресумпција на невиност не можат да ги соопштат лицата за кои е поднесена кривичната пријава.

Информација нема ниту од Јавното обвинителство. Костовски јавно неколку пати обвини дека неговата банка била жртвено јагне за некои други интереси и се уште тврди дека со свеж капитал банката можела да се спаси.