Роуан Аткинсон, славниот англиски комичар и актер кој се прослави преку улогата на Господин Бин, ја обвини екипата на култната серија „Пријатели“ дека му го украле трикот со мисирката на глава од неговиот легендарен ситком „Господин Бин“.

Комичарот за ова раскажа во новиот документарец „Среќен роденден Господин Бин“, кој се емитува на „ITV“ по повод 30-годишнината од создавањето на хумористичниот лик по кој Аткинсон стана популарен.

Сите сигурно се сеќаваат на сцената кога на Господин Бин ќе му се заглави главата во огромна мисирка уште во 1992 година, а шест години подоцна истиот трик се појави и во серијата „Пријатели“ и тоа во епизодата „The One With All The Thanksgivings”.

Џои, кој го глумеше Мет Лебланк, исто така ја заглави главата во голема мисирка, а потоа тоа го повтори и Моника, која ја играше Кортни Кокс.

„Кога во 1996 година го снимавме филмот за Господин Бин, одлучивме да ја повториме сцената од една епизода од ситкомот и да ја искористиме шегата со мисирката на глава. И „Пријатели“ се снимаа во 90-те, кога всушност и ја украдоа шегата“, изјави Аткинсон пред неколку дена, додавајќи дека бројни луѓе мислат дека ситуацијата е обратна, и дека тој ја украл шегата од „Пријатели“.